|
Бану Исраилазул кlиго вацасул къиса. (сурату-ль-кагьфалда жаниса босараб) |
|
08.06.2008 |
32. Дуца гьел мискинал муъминзаби дуда аскIор тоге абулел мушриказе мисал баче МухIаммад кIиго чиясул
Тапсиралъул гIалимзабаца абуна: гьав кIиго чи бануисраилазул кIиго вацц вуго: цояв жинца иман лъурав, цогидав иман лъечIев. Гьав кIиясего эменги хун ирсалъе гIемераб боцIи-мал щвана. Гьев капурав вацас гьеб малалъухъ кIиго ах босана. Муъминав вацас жиндие щвараб боцIи садакъаде бикьана ва живги Аллагьасе гIибадат гьабиялда тIад чIана. Цинги дов цояв вацас гьасда рогьоб бана мун мискинчи вугин абун. ТIадегIанав Аллагьас жиндир кIиябго ахги гьалаг гьабун, щибго жо гьабизе гьунарги гьечIого, кверал кIорокIулев хутIана гьев капурав вац. Гьаб мисал буго Аллагьасе гIибадат гьабулев муъминчиясеги, жиндир боцIи-малалдасан чIухIарав капур чиясеги бачараб мисал.
ТIадегIанав Аллагьас абулеб буго: Гьениб жаниб чваххун унеб лъимги букIана. Инсанасе букIине бокьулеб ва гьесул жинда ракI гъолеб берцинаб ах-хур буго гьеб.
33. Гьеб кIиябго ахалъ щибго гъвет1 гьоркьоб хутIичIого лъикIаб, бечедаб пихъги кьолеб букIана. Жиб лъалъазе даимго гьениб чваххулеб лъимги букIана.
34. Гьев капурав вацасе гIемераб пихъги букIана:цIибил букIана батIи-батIияб тайпаялъул, чамастакги букIана, хуриб бижулеб тIорщел ва бахча бакIана. Цинги гьес жиндир гьалмагъасда абуна жив гьесда данде чIухIун кIалъалевлъун вукIун: «Дун дудаса бечедавги вуго, дир гьудулзабиги гIемер руго, дие хъулухъ гьабулел гъарабащалги гIемер руго»-абун.
35. Цинги гьев жиндирго ахикь жанив лъугьана квер ккун цадахъ вацги вачун ва гьесда жиндир ах-хур бихьизе гьабизе лъугьана. Гьелдалъун вохун, Аллагьасе шукру-рецц гьабичIого гьев жиндирго напсалъе зулму гьабулевлъунги вукIана. Гьеб ах-хур бижизе гьабурав Аллагьасе гьеб гьалаг гьабизе кIолеблъиялъул щибго пикру гьабулеб букIинчIо. Гьанже жинца гьеб пихъ ва хур бакIаризе мех щун бугин, жиндие гIемераб хайир щолин абун пикрабазда вукIана. Гьеб ахил бетIергьанасги абуна: «Дида ракIалда кколаро кидаго гьаб нигIмат дида тIаса инин»-абун.
36. «Дида ракIалда кколаро къиямасеб къо чIелин абун ва ахиратги, хIисаб мизанги букIилин абун. Нагагь гьеб ахиратги букIун дун дир бетIергьанасухъе вуссине гьавизе ватаниги, гьенибги дие гьаб дунялалда бугелдасаги лъикIаб магIишат ва бечелъи букIине буго»-абун. Дие дунялалда кьун бугелъул гьаб бечелъи, дун гьеб кьезе мустахIикъав вукIун ва дун хирияв вукIун. Ахираталда дие жегиги лъикI кьезе ккола Аллагьас гьеб бечелъи ва хиралъи абун.
37. Гьесдехун жиндир муъминав вацас абуна, гьев кантIизе бокьун ва гьес иман лъелародай абун: «Дуца инкар кколебищ бугеб жинца мун ракьалдаса вижарав Аллагьасда. Дур тIоцевесев эмен Адам ракьалдаса вижун. Цинги мун вижарав манидал къатраялдаса ва мун гьадинав сахав, берцинав, лугби рекъарав, гIакълолъай бугев инсанлъун гьавурав. Дуда кин бичIулареб дур бетIергьан Аллагь вукIин кинабго жоялда жиндир хIалкIолъи гIаммав, гьаб берцинаб ах-хур дуе кьурав ва гьеб дудаса нахъе босизеги кIолев.
38. Дун ракI-ракIалъ божарав вуго дир БетIергьан Аллагь вукIиналда: жинца дун вижарав ва жинца дун хьихьулев, дица жиндие гIибадат гьабизе тIадав. Дица гьев Аллагьасе гIибадат гьабула ва гьеб гIибадаталъулъ дица щибго жо гIахьалги гьабуларо Аллагьасдехун.
39. Дуца гьаб ахикь жанив лъугьунеб мехалъ абун букIарабани: «Машааллагь! ЦIакъ берцинаб, бечедаб ах кьун бугоха Аллагьас дие. Гьаб ах бижизе гьабизе, гьадинаб бечедаб пихъ гьениб бижизе гьабизеги хIал кIоларо цохIо Аллагьасда гурони»-абун. Гьеб букIана дуе лъикIаб ва дуца абизе рекъараб. Гьев Аллагь вуго кинабго ишалда нилъер хIал кIвезе гьабулев, жиндие гIибадат гьабизе гьесул тавпикъ букIун гурони хIал кIоларо ва Аллагь цо гьавиги гьесулго тIоритIелалдалъун букIуна.
ГIалимзабаца абуна: «Цо жив гIажаиблъизе гьавураб амру бихьараб мехалъ гьев чияс абизе рекъараб буго: «Маша Аллагьу ва ла хIавла ва ла къуввата илла би Ллагьи»-абун. Аллагьасул свалат салам лъеяв аварагасдаса бицараб хIадисалда буго: «Аллагьас цо лагъасе нигIмат кьураб мехалъ: хъизан бугониги, вас вугониги, боцIи-мал бугониги, цинги жинцаги абураб мехалъ: «Маша Аллагьу ла хIавла вала къувата илла би Ллагьи»-абун, гьев чиясул нигIматазда тIаде балагь къварилъи бачIунаро жив хвезегIан»-абун. Дуда дун вихьулев ватани боцIиги, васалги дагьавлъун:
40. Дир божи буго дир бетIергьан Аллагьасда гьес дие гьаб дуралдасаги лъакIаб ах-хур кьелин абун. Гьаб дур ахалда тIадги Аллагьас зодисан цо балагь биччалин ва гьаб бакI тIад рахъун чIезе кIолареб цIвакараб къоно гIадин гьабилин абун. Жиндие бокьани гьеб иш гьабизе кIолев вуго Аллагь.
41. Гьеб дур ахикь бугеб лъим тIагIун ракьулъе ине бегьула, цинги дуда гьеб лълъим тIалаб гьабизе ва батизе гьабизе кIоларо. Муъминав вацас Аллагьасул хIал кIолъиялъе мисалал рачана, гьев цо вукIиналда ва жиндие гIибадат гьабизе тIадав вукIиналда т1орит1ел гьабулел далилалги рицана. Амма гьесул вацасе гьеб вагIзаялъ асар гьабичIо, гьесул чIухIиги тIаса инчIо, ахIмакълъиги жегиги цIикIкIана.
42. Гьесул пихъ барщараб ахалда тIаде Аллагьас жиндир балагь биччана ва гьеб кIалагъокье сверун, щибго жиндаса мунпагIат босизе бегьулареб хIалалде сверана. Гьенив эхетун, цоялда цояб хъат кьабун, чара тIагIун зигардулев гьеб ахил бетIергьанги хутIана: жинца гьелъухъ кьун букIараб боцIималги ракIалда щвана гьесда. Гьениб гьабун букIараб хIалтIиги ракIалда щвана, жиндие гьеб ахикьан бачIине букIараб бечедаб бачIинги, гьелдалъун жинца гьабизе букIараб аваданаб ящавги ракIалда щвана. Ахирги гьесда бичIчIана гьеб балагь жинда тIаде бачIараблъи Т1адег1анав Аллагьасда гIасилъи сабаблъун. Ва цинги гьес абуна: «Вай дие бугеб къварилъи! Дица Аллагьасдехун щибго жо гIахьал гьабун ширк гьабун букIинчIеб ани»-абун. Гьев пашманлъана гьеб пашманлъиялъ жиндие мунпагIат гьабулареб гIужалъ.
43. Гьесие квер бакъулеб цониги къукъаги букIинчIо Гьев Аллагьасул гIазаб жиндаса нахъе чIвалеб. Гьесда жиндагоги щибго жо гьабизе кIвечIо жиндир ах-хур Аллагьас гьалаг гьабураб мехалъ. Гьесда данде вахъун, гьесдаса рецIел босизе к1веч1о.Гьесие кумек гьабичIо жив жидедаса чIухIун вукIарал васалазги, гIагарлъиялъги, гIарац меседалъги.
Я гьав инсан! ТIадегIанав Аллагьас мун кантIизе бокьун гьаб хирияб Къуръаналда жаниб цIакъ гIемераб къиса бицунеб буго, мисалги бачунеб буго: дуца пикруго гьабулеб бугищ? Дуца дур напс гьаб Къуръаналда рехсарал лъикIалги квешалги гIадамазул бакIалда лъолеб бугищ? Гьаб хирияб Къуръан Аллагьас рештIине гьабун буго жинца гIадамал тIоритIулеблъун, гьеб Къуръаналъ тIоритIулел гIадамалги жидеца Къуръаналъул вагIза босулел гIадамал руго. Гьаб жо бичIчIа инсан ва гьаб Къуръаналъ жал тIоритIараздаса вукIине яхI бахъе! Къуръаналъ жидее лагIнат кьолев чи вуго жинца Къурьан цIалулев ва гьелъул вагIза босуларев ва гьелда гIамал гьабуларев. Гьев чилъун мунго вук1иналдаса ц1уне.
САСИКЬАСА Г1АБДУРАХ1МАНИЛ ТАФСИРАЛДАСА БОСАРАБ
ИА GURABA
|
