Шарг1алда нифакъ абураб жоялъул маг1на ккола загьиралда ислам бихьизаби, х1акъикъаталда жив божуларевлъунги вук1аго. Нифакъин абун гьелда ц1ар лъуна, шарг1алда жаниве цо нуц1ихъанги лъугьун инсан, цойги нуц1ихъан къват1иве лъугьунев вук1иналъ. Аллагьас абуна:

«...х1акълъунго мунафикъзаби руго Аллагьасе мут1иг1лъиялдаса рахъарал фасикъзаби». (Ат-Тавбагь, 9 сурат, 67 аят).

Ай, жал шарг1алдаса къват1ире рахъарал руго. Аллагьас мунафикъзаби рик1к1унел руго кафурзабаздасаги квешаллъун ва Аллагьас абулеб буго:

«Х1акълъунго мунафикъзаби жужах1алъул бищун гъоркьияб т1алаялда рук1ине руго...». (Ан-Нисаъ, 4 сурат, 145аят).

Ва гьединго Аллагьас абуна:

«Х1акълъунго мунафикъзаби жидеца Аллагь гуккула абун руго. Х1акъикъаталда Аллагь вуго жинца гьел гуккарав...». Ан-Нисаъ, 4 сурат, 142аят).

Ва гьединго Аллагьас абуна:

«Жидеца т1адег1анав Аллагьги, муъминзабиги гуккула абун руго гьел. Амма гьез жидерго нафсал гуккулел руго ва гьезда гьаб х1укмо гьадин бук1инги лъалеб гьеч1о. Гьезул рак1азулъ унти (ай шаклъи) буго ва Аллагьас гьезул шаклъи ц1ик1к1инабула, жидер нифакъги ц1ик1инабун. Ахираталда гьезие ц1акъ жинца унтизабулеб г1азаб бук1ине буго, гьезул гьересси сабаблъун». (Аль-Бакъарати, 2 сурат, 9-10 аят).

Т1оцебесеб нифакъалъул тайпа ккола г1акъидаялъулъ бук1унеб нифакъ – гьебги ккола к1удияб нифакъ. Гьеб жиндилъ бугев чияс исламги загьир гьабун, куфро жаниб бахчун тола, ва гьеб нифакъалъ г1адан т1убанго исламалдаса вахъун ккезавула. Гьеб жиндилъ бугев чи жужах1алъул т1инда вук1уна, гьединазе Аллагьас киналго квешлъиялъул сифаталги гьаруна: «кафурзаби, иман лъеч1ел, диналдаги ва гьелъул агьлуялдаги т1ад релъулел, кафурзабадехун гьет1улел ва гьезие исламалда данде рагъ базе кумек гьабулел», - абун. Ва гьел мунафикъзабиги рук1уна щибаб заманаялда. Хасго гьединал чаг1и рук1уна исламалъул къуват ц1ик1к1араб мехалъ ва загьиралда буссурбабазда данде рахъине к1олареб мехалъ. Гьез жидер «ислам» загьир гьабизе байбихьула, жал исламалде лъугьунел ругин абун. Гьел исламадеги лъугьуна исламалъе ва гьелъул агьлуялъе жанисан х1илла-рек1к1 гьабизелъун. Гьединго буссурбабазда гъорлъ г1умро гьабизе ва жидерго биялги, боц1иги хвасар гьабизе. Цинги, гьев мунафикъас загьир гьабизе байбихьула, жинца иман лъолин Аллагьасдаги, малаикзабаздаги, т1ухьдуздаги, расулаздаги ва къиямасеб къоялдеги абун. Амма гьел мунафикъзаби жанисан иман лъеялдаса рац1ц1адал рук1уна ва гьеб кинабго гьереси гьабулеллъунги рук1уна. Ва Аллагьасде иманги лъоларо гьез.

Х1акълъунго т1адег1анав Аллагь к1алъана жиндирго каламалдалъун, ва къуръанги решт1инабуна инсанасде, ва гьев инсанги гьавуна жиндирго расуллъун (ай чапарлъун) г1адамазухъе, Аллагьасул изнуялдалъун гьел бит1араб нухде т1орит1изе, ва гьезие х1инкъиги кьезе Аллагьасул г1азабалдалъун.

Т1адег1анав Аллагьас гьел мунафикъзабазул пардавалги т1ун г1одоре рехана ва гьезул балъголъабиги т1атинаруна къуръаналда жаниб. Ва жиндирго лагъзадерие жидер диналъул амрабиги баян гьаруна, гьел рук1ине къуъаналъул агьлулъун ва даимго жал гьелдалъун ц1унараллъунги. Ва Аллагьас рехсана суаратул Бакъараталъул байбихьуда, «г1адамал лъабабго тайпа рук1уна», - абун: муъминзаби, кафурзаби ва мунафикъзаби. Муъминзабазул х1акъалъулъ ункъго аят рехсана, кафурзабазул х1акъалъулъ к1иго рехсана, амма, мунафикъзабазул х1акъалъулъ абуни – анц1ила лъабго аят рехсана. Щай гурелъул, гьезул къадаралъул г1емерлъиялъ, гьел сабаблъун бук1унеб х1албихьиялъул г1емерлъиялъ, ва исламалъе ва гьелъул агьлуялъе гьездалъун бук1унеб фитнаялъул г1емерлъиялъги. Гьездалъун исламалъе бугеб балагьал ц1акъ к1удиял руго. Гьел, жал буссурбабиян ч1ч1ун рук1унелъул ва жидеца исламалъе квербакъи гьабулин абун рук1унелъул, жалги х1акъикъаталда исламалъул тушбабилъун рук1аго.

Гьаб нифакъги анлъго жоялъулъ буго:

2) Аварагасухъе решт1арал цо-цо жал гьереси гьаби.

4) Аварагасухъе решт1арал цо-цо жалазда ццин бахъин.

5) Аварагасулдин г1одобег1ан ккеялдалъун роххи.

К1иабилеб тайпа нифакъалъул кколаг1амалалдалъун бук1унеб нифакъ – гьебги бук1уна буссурбабаз мунафикъзабазул г1амалаздаса цо-цо г1амал гьаби, иманги жидер рек1елъ бук1аго. Гьадинаб нифакъалъ исламалдаса къват1иве рехуларо – кин бугониги, гьеб ккола г1акъидаялъулъ бугеб нифакъалде унеб нух. Гьеб жиндилъ бугев чиясулъ иманги, нифакъги цадахъ бук1уна. Нифакъ жиндилъ ц1ик1к1ани, гьев лъугьуна бац1адав мунафикъ – гьелъие далилги аварагасул (жинда ссвалат салам лъеяв) раг1и буго: «Ункъго г1амал буго, жиндилъ гьеб бугони, г1адан вац1ц1адав мунафикълъун вук1унеб жо: аманаталъе хиянат гьаби, хабар бицунаго гьереси бицин, къот1иялъе хилифлъи, даг1бадулаго вагъи. Гьаб ункъалъулго цоябниги жиндилъ бугони, гьесулъ нифакъалъул бут1а бук1уна, жинца гьеб рехун тезег1ан». (Бухари ва Муслим).

Гьаб ункъабго жиндилъ бак1арарав чи – жиндилъ квешлъи бак1арарав чи вук1уна, ва вац1ц1адав мунафикъасул сифат жиндие щварав чиги вук1уна. Нифакъ ц1акъ квешаб ва жиндаса х1инкъизе кколеб жо буго. Асх1абзабицин (жидедаса Аллагь разилъаял) ц1акъ х1инкъулаан гьеб нифакъ жиделъго батизе гурин абун.

К1удияб нифакъалда ва гьит1инаб нифакъалда гьоркьор ругел бат1алъаби.

1) К1удияб нифакъалъ исламалдаса рахъун ккезарула, амма гьит1инаб нифакъалъ гьаруларо.

2) К1удияб нифакъ ккола г1акъидаялда жаниб т1атун ва балъго гьабулеб жалалъулъ хилифлъи, амма, гьит1инаб абуни – г1амалазда жаниб, т1атун ва балъго гьабулеб жалазулъ бук1уна.

3) К1удияб нифакъ муъминчиясдаса кколаро, гьит1инаб нифакъ муъминасдасаги ккола.

4) К1удияб нифакъ гьабулезул г1емерисез тавбо гьабуларо, т1авбо гьабуниги гьезул тавбо къабул гьабиялъулъги хилаф буго. Гьит1инаб нифакъ гьабулев чияс тавбо гьабизеги бегьула, Аллагьас гьесул тавбоги къабул гьабула.

Ибну Таймиятица абуна: «г1емерисел муъминзаби нифакъалде гъокье ккола, цинги Аллагьас гьезул тавбо къабул гьабула. Гьезул рек1елъе реххула нифакъалде кколел жал, амма Аллагьас гьездаса гьединал пикраби нахъе ч1вала.

Муъминчиясул х1албихьи гьабула щайт1абазул вас-васалдалъун ва куфроялъул вас-васалдаялъунги, гьелги, жидеца муъминчиясул рак1 къварид гьабулел вас-васал, асх1абзабаз абураб г1адин: «Я Бичасул авараг, нижер рак1алде ккола цо-цо пикраби, гьеб бицинег1ан зодосан ракьалде рортизе бокьула нижее», - абун. Цинги аварагас,«гьеб буго иманалъул щулалъи», - ян абуна. (Имам Ах1мадица ва Муслимица бицана).

Ва амма, к1удияб нифакъалъул агьлуялъул х1акъалъулъ Аллагьас абуна:

«Цинги гьел г1инкъал лъугьана, жидеда х1акъаб жо раг1уларел, мац1 лъаларел ва к1алъазе к1олареллъунги лъугьана, жидеда щибго лъик1аб раг1и абизе лъаларел. Беццалги лъугьана: жидер къосиналъул беццлъи буго гьеб ва жидер рак1азул беццлъиги буго. Цинги жал гьаб къосараб, гьалаглъараб х1алалдаса, х1акъаб нухалдеги руссунаро». Ай, исламалде руссунаро. Аль-Бакъарагь, 2 сурат, 18аят).

Жеги Аллагьас гьезул х1акъалъулъ абуна:

«Гьел мунафикъазда г1айиб ч1ван сурат решт1инабураб мехалъ, жалги аварагасда аск1ор, асх1абзабазда гьоркьор рук1аго, гьел доре-гьанире балагьулел руго, жидехъ балагьун цониги чи вугодай абун ва хехго гьениса нахъе рахъун унел руго. Аллагьас гьезул рак1ал иманалдаса руссизарун руго, гьел ругелъул жидеда щибго жо бич1ч1уларел, ах1макъал г1адамал». (Ат-Тавбагь, 9 сурат, 126 аят).

Шейхуль ислам, Ибну Таймиятица (рах1имагьуллагь) абуна: Г1алимзабазда гьоркьоб хилаф ккана, «гьезул тавбо къабул гьабулищ загьиралда борцун, щай гурелъул, гьез даимго ислам загьир гьабулеб бук1индал, жанисан гьелда данде ч1ч1унги рук1аго», - абун.