Имам аш-Шафиг1ияс хвалда цебе гьабураб васият

Абу Г1али Х1усейн ибну Гьимам ибну Г1умар аль-Баладияс абуна:

Гьаб буго Мух1амад ибну Идрис Шафиг1иясул رَضِيَ الله ُعَنْه васият. Х1акълъунго гьес гьадинаб васият гьабуна:

- Дица нуг1лъи гьабула жиндие лагълъи гьабизе кколеб щибго жо гьеч1ин вати т1адав цо Аллагь гурони, ва гьесие г1ахьалчиги гьеч1о. Ва Мух1аммад (жинда ссвалат салам лъеяв) Аллагьасул лагъги, нилъеде дин малъизе вит1арав чапарги вугин абун.

- Ва дица иман лъола, Алагьасда, Малаикзабазда, т1ухьдузда ва бат1алъи гьабуларо Аварагзабазда (жидеда Аллагьасул ссвалат салам лъеял) гьоркъоб.

- Х1акълъунго дир какги, х1елиги, ч1аголъиги, хвелги г1аламалъулго бет1ергьан Аллагьасе буго, жиндие г1ахьалчи гьеч1ев, гьелдалъун дида амруги гьабурав.

- Ва х1акълъунго Аллагьас хабазда жаниса рахъине гьаризеги руго къиямасеб къоялъ.

- Ва х1акълъунго алжанги х1акъаб буго.

- Ва х1акълъунго жужах1ги х1акъаб буго.

- Ва х1акълъунго хабал г1азабги, х1исабги, ц1адирабиги, сират1алъул кьоги х1акъаб буго.

- Ва х1акълъунго Аллагьас жазаъги гьабула лагъзадерил г1амалалда рекъон.


- Гьалда ч1аголъула ва хола дун, ва гьелда вахъинеги гьавула къиямасеб къоялъ.

- Ва х1акълъунго жеги нуг1лъи гьабула дица, х1акълъунго иман бугин:
1-къавлуги (к1алалъ аби), 2-г1амал гьабиги, 3-рак1алъ лъайги, гьеб (иман) ц1ик1к1уна ва дагьлъула, - ян абун.

- Ва х1акълъунго къуръанги Аллагьасул калам буго, жиб бижич1еб.

- Ва х1акълъунго Аллагьги вихьула ахираталда, муъминзабиги ралагьула Гьесухъе загьирго ва гьезда Аллагьасул каламги раг1ула.

- Ва х1акълъунго Аллагь г1аршалда вуго.

- Ва х1акълъунго къадар, лъик1аб бук1а гьеб яги квешаб бук1а, Аллагьасдасан буго, х1укму-къадарги гьесие бокьараб гурони бук1унаро.

Ва х1акълъунго дица иман лъола Аварагасда (жинда ссвалат салам лъеяв) хадур бищун лъик1ал г1адамал гьаб умматалдаса: Абу бакр, Г1умар, Г1усман, Г1али ибну Аби Т1алиб (жододаса Аллагь разилъаял) рук1иналда. Дица валяъги (ай рокьи ва гьуинлъи) гьабула гьездехун. Мунагьал чуриги т1алаб гьабула гьезиеги, агьлу аль-Жамалалъеги (варанидул рагъ), Сифиналда рагъаразеги, ч1варазеги, ва киналго Аварагасул (жинда ссвалат салам лъеяв) асх1абзабазеги.

- Ва г1инаккиги, мут1иг1лъиги буго амруялъул бет1ергьабазе гьез как балеб г1анасеб мехалъ. Хвалчабаца вулатазде (бут1рул) дандеги рахъунаро. Халифги къурайшиядаса вук1уна.

- Х1акълъунго дагьабги г1аракъилъун рик1к1уна г1емералъ мехтизе гьабулеб бугони.

- Ва х1акълъунго мутг1аги (ай фуланаб заманаялъ йиччазейин нияталда хъизан ячин ) х1арамаб буго.

- Цинги дица васият гьабулеб буго Аллагьасукъа х1инкъиялдалъунги, Аварагасул (жинда ссвалат салам лъеяв) асх1абхабазул суннат-асарал кквеялдалъунги, бидг1аби ва гьаваялда нахъ рилъин теялдалъунги, ва гьеб рик1к1ад гьабиялдалъунги.

- Нужги х1инкъа Аллагьасукъа унго-унгояб х1инкъиялдалъун, ва нужги хоге буссурбабилъун рук1ун гурони, гьеб буго цере аразулги гьанже ругезулги васият (ай Имаму Шафиг1иясул رَضِيَ الله ُعَنْه заманаялъ рук1аразул, гьебги ккола хириял лъабго г1асрабазул к1иабилеб г1асру).

- Щив чи вугониги Аллагьасукъа х1инкъун гьесие Аллагьас къварилъиялдаса ворч1изе бак1 гьабула, гьесие ризкъиги кьола х1исаб гьеч1еб куцалъ.

- Нужеда т1аддаб буго рузманги, жамаг1атги, суннаталда т1адч1ей гьабиги, иман лъейги, дин лъазабиги.

- Щив чи нужедаса дун холев мехалъ дида аск1ов вугониги, гьес дида бич1изабе:

(لاَ إِلَهَ إِلاَّ اللهُ وَحْدَه ُلاَ شَرِيكَ لَهُ، وَأَنَّ مُحَمَّدًا عَبْدُهُ ورَسُولُهُْ، )

«Жиндие г1ибадат гьабизе т1алъулеб щибго жо гьеч1о Аллагь гурони, Жив цогояв ва жиндие г1ахьалчиги гьеч1ев, ва Мух1аммадги Гьесул лагъ ва чапар вуго», - абун.

- Нужеца хвелалде цебе дир малъалги, михъалги къач1ай иншааЛлагь.

- Дир рух1 бахъулеб мехалъ дида аск1ой йигони х1айизалда йигей г1адан, гьей яхъа дида аск1оса ва берцинаб мах1ги гьабе дир бусада аск1об.

Гьаб босана Имам Жалалу Ддин Ас-Суют1иясул « ал амру бил иттибаг1 ва-н-нагью г1анил ибтидаг1» абураб т1ехьалдаса.

Таржама гьабун лъуг1ана 28 рамазан моц1алъ 1426. с.
Миладияб тарихалъул 31 /10 /2005 сон.
Гьебги гьабуна г1елму т1алаб гьабулев вугев мутагlилас.

وآخرُ َدعوانا أن الحمد لله رب العالمين