Бихьинчи: Дуца пикру гьабе мун дурго рокъов ц1акъ к1вар кьун г1енеккун вуго клипазухъ. Цадахъго бух1улеб хъалияналъул к1к1уялъ нак1к1 лъураб г1адин гьабун рукъги буго.

Ч1ужуг1адан: Дуца пикру гьабе, мун гьабсаг1ат мат1уялда цееги яхъун ч1ун, т1убараб саг1аталъ, цо «ц1акъ к1вар бугеб» бак1алде уней йик1ун, цояб кодоб ккун берал релъунеб къаламгун, цойгидаб кодоб духидул шишагун.

К1иязего г1ахьалаб: Тохлъукьего к1ут1ана нуц1ида, векерана (екерана) нуц1ихъе, цинги балагьула мун глазокалъусан, щивдай вугев нуц1ида к1ут1улев чи абун?

Гьесул гьумералда буго нуралъул кунч1и.

- «Щив», - абун гьикъула дуца?

- «Дун Бичасул Авараг вуго», - абун жаваб кьола. Цинги дур гьаракь борч1улеб буго: - «Унго-унголъунги Авараг…»!

Бихьинчи: Вохуца холаго дуца квер бегьулеб буго нуц1а рагьизе. Гьеб лах1заталъ дуда рак1алде щолеб буго телевизоралдасан клипал риччан рук1ин. Хехлъи гьабун векерула мун гьеб ссвинабизе, лъач1ого цогидаб кнопкаялдаги цун, ц1ик1к1уна клипалъул гьаракь. Кинниги свинабун телевизоргун, нахъеги векерана мун нуц1а рагьизе. Вай, рукъ ц1ун къадада ран ругел коч1охъабазул суратал! Нахъеги хех гьабун векерана мун гьел суратал къададаса рахъизе. Цойги нухалъ кьабулеб буго ц1умур. Г1едег1ун гьел суратал къададаса рахъулаго цо сурат столалде бортун ана. Гьеб босизеян квер бегьарабго гьенир ратулел руго дуда музыка-клипазул дискал ва кассетаби. Киналго гьел куч1дузул дискал ва кассетаби руго, цоял г1енеккун тарал, цойгидал рек1ехъе лъазарун рахъарал, къуръан-х1адис добег1ан рехунги тун. Щибго пикруги гьабич1ого дуца гьел рак1а-рахарун цо ящик1алъуре ккезарулел руго къан к1алт1угун, Аварагасда (жинда ссвалат салам лъеяв) рихьич1ого рук1ине. Нахъеги кьабулеб буго ц1умур. Аллагьасул чапар гьабсаг1ат нахъе инеги бегьула…

Ч1ужуг1адан: Авараг (жинда ссвалат салам лъеяв) гьоболлъухъ вач1иналдаса йохуца холаго бегьулеб буго дуца квер нуц1а рагьизе. Рак1алде щвана т1ад к1азго гьеч1еб, парикмахерскиялда белъун, къокъ гьарун расалгун, къват1ие яхъиналде къач1араб бет1ер.

- Вай, кин дун гьадин Авараггун данде ч1вазе йигей?! Екерана мун бот1рода ч1вазе к1аз балагьизе. Батана дуда гьеб шифоньералъул бок1нилъ. Гьаб данде кколаро, чара гьеч1ого к1удияб къвариг1уна. Кинниги, г1емераб хъирщадун дуда гьеб батана ва екерана нуц1а рагьизе.

-Вай Аллагь, кин Авараггун данде ч1валей т1ажуги рет1ун? Цинги екерана мун, Авараг (жинда ссвалат салам лъеяв) т1ад вуссун иналде халатаб, г1ат1идаб горде яги халг1ат балагьизе. Кинниги батана дуда гьебги. Нахъеги нуц1а рагьулаго рак1алде щвана косметика бахун къач1араб куц. Хехлъи гьабун екерана мун сапун бахун, гьумер чуризе. Гьанжеги рак1алде швана одекалоналъул, киллометраялъ рик1адасанго ч1валеб х1алалъ дуцаго гьабулел мах1ал. Рецц Аллагьасе, Аварагас нуц1ида к1ут1ана дица гьеб т1аде реч1изабилалде.

Бихьинчи: Ахирги дуца Аварагасе (жинда ссвалат салам лъеяв) нуц1а рагьулеб буго. Дуда Авараг (жинда ссвалат салам лъеяв) г1емер балагьунги ч1ун, дуца нуц1аги рагьич1ого ун ватана. Балагьана мун болъодаса гъоркье. Дуда вихьана гьев болъодаса гъоркье рещт1унев, цинги дуца гьесде ах1улеб буго:

- Я Бичасул хирияв Авараг (жинда ссвалат салам лъеяв), дица нуц1а рагьана, вач1а т1аде!

Гьев т1ад вуссун вач1ана ва саламги кьун, изнуги т1алаб гьабун дур рокъове жаниве лъугьана. Гьанже дуда рак1алде кколеб буго жанивег1аги лъугьун вук1инч1евани Авараг абун.

Гьесда аск1ов г1одов ч1олаго бач1ана дур телефоналде звонок, гьебги бищунго модаялда бугеб бакъан. Аварагасдаса нечон довехун вуссаравго балагьана к1алъалеб бугеб номералде. Гьеб бихьидал дур рек1ел кьаби жеги ц1ик1к1ине байбихьана.

- Щиб дица Аварагасда абизе бугеб, «щив гьав духъе к1алъалев вугев чи», - абун гьес дида гьикъани? Гьедин гьикъич1ого бук1ине дуца телефон свинабулеб буго.

Аварагасда хъег1и реч1ч1улеб буго. Гьеб мехалъ рак1алде щвана дуда рукъ хъалияналъ к1к1уйда босун бук1ин.

- «Вах1, кин дида к1очон тараб пепельницаялъуб бугеб хъалиян»? Цинги векерана мун гьеб свинабизе. Т1ад вуссун щведал Аварагас (жинда ссвалат салам лъеяв) дуда абулеб буго:

- Дур гьеб кесениб бугеб къуръан кье дихъе.

- Гьаб къуръан гуро Бичасул Авараг, гьаб хъалияназул пачка буго. К1везе бугищ дуда Аварагасда гьедин абизе?! Тохлъукьего дуда раг1улеб буго ах1улеб какил гьаракь. Унел руго нуж как базе мажгидалде. Мун кидагойищ мажгиталде унев вук1арав? Яги Аварагасда (жинда ссвалат салам лъеяв) берцин бихьизе жо гьабулевищ мун вугев?

К1иязего г1ахьалаб: Щиб жаваб кьезе бугеб, ахирисеб нухалъ къуръан кида ц1аларабан гьикъани? Щиб жаваб кьезе бугеб ахирисеб нухалъ рогьалил как мажгидалда кида барабан гьикъани? Щиб нилъеца гьабизе бугеб, рокьул къисабазул, бихьиналги руччаби жоран гьабулел данделъабазул, х1арамаб хьвада-ч1вадиялъул, паркал-кафеязда рорч1улел сардазул, телевизор-компютералда цере рогьунел сардазул, гьекъолеб г1аракъиялъул, эбел-инсуе кьолеб г1акъуба-г1азабалъул, х1арамал бак1азда ралагьулел беразул, зоб бихъуледухъ биччан г1енеккулеб музыкаялъул х1акъалъулъ гьикъани? Пикру гьабе гьаб киналъулго.

Аварагас (жинда ссвалат салам лъеяв) щиб гьабизе бугеб нилъер гьаб х1ал бихьидал? Аварагасул (жинда ссвалат салам лъеяв) ццин бахъинаро, амма г1одилаха пашманаб, къваридаб г1одиялъ.

- Мун вуго духъе дин щвезабулаго г1емераб биги г1ет1ги дица г1одобе т1урав.

- Мун вуго асх1абзабазул хабал дунялалдаго т1орит1арав, гьаб дин духъе швезабулаго.

- Мун йиго Г1аишатилги, Фат1иматилги, Хадижатилги ясазул яс.

- Нуж руго гьаб дин дидаса хадуб, нужеца баччилин абун дида рак1алде ккун бук1арал.

- Кин дица нужее шафаг1ат гьабилеб нуж гьаб х1алалдаги рук1ун, ва кин дица нужее дир х1авзалдаса гьекъезе лъим кьелеб къиямасеб къоялъ, нужеца дир сунатги ц1унич1ого?

Гьанже дуца лъик1 пикру гьабе; гьев духъе вач1арав чи Авараг (жинда ссвалат салам лъеяв) гьеч1о, гьев вуго Малакул Мавт. Гьес нуц1ида к1ут1уларо ва дуца гьеб рагьизег1ан балагьунги ч1оларо. Кинабниги жо бахчизе ва рекъезабизе дуда заманги батуларо. Тарал какал рец1изе рес кьоларо, гьединго шарг1ияб рет1ел рет1инеги замана бук1унаро. Кин мун хваниги, гьеб къаг1идаялъ т1адеги вахъинавула къиямасеб къоялъ. Лъик1 пикру гьабе гьеб къоялъ дурго бук1ине бугеб х1алалъул.

Ва г1олилал! Нилъеца нилъер умматалъул х1ал хисизабизе бугищ?! Нилъ Аварагасул (жинда ссвалат салам лъеяв) нухдасан хьвадизе ругищ?!

Тохлъукьего, гьудул гьалмагъзабазул бахъараб г1адин дурги рух1 бахъизе рух1ал рахъулев малаик вач1индал, духъе хабалъе Мункар-Накирги вач1индал, дурго нафс ц1адирабазда т1адагьабги батидал, кинабниги дуца дунялалда гьабураб жоялъул х1исаб суал гьабулеб къоги бач1индал – гьеб мехалъ дуда щаклъи гьеч1ого рак1алде щвезе буго гьаб рисалат. Гьеб къоялъ мунги вук1унаро к1игоязул цоявлъун гурони - яги талих1 бугездаса вук1ина мун, яги талих1 къосараздаса вук1ина.

Гьеб къо бач1иналде х1адурлъи гьабураздаса рук1ине х1аракат бахъе диналъул вацал!

Г1арабалдаса буссинабуна Абу Юсуфица

ИА GURABA