Т1адег1анав Аллагьас абулеб буго {исраъ} абураб сураялъулъ 23-аяталда: Дур бет1ергьан Аллагьас жиндир лагъзадерида амро гьабуна ва васият гьабуна цох1о жиндие гурони лагълъи гьабуге абун, гьединго амро гьабуна эбел-инсуе лъик1лъи гьабеян абунги, гьел эбел-инсул к1иялго яги цоял херлъун дуда аск1ор хут1ани дуца гьезда шибго рихунеб раг1и абуге, гьезда бокьулареб жоги раг1изе гьабуге, кидаго гьезда бицунеб раг1и тамахаб, х1еренаб бице.

Гьаб аяталда Аллагьас амро гьабулеб буго жиндирго лагъзадерида цох1о жиндие г1ибадат гьабеян, жиндие г1ибадаталъулъ г1ахьалчиги (ай- хъанчал, малаикал, г1адамал, жинал) гьавугеян. Аллагьас г1ибадаталда хурхине гьабулеб буго эбел-инсуе лъик1лъи гьаби. Гьеб г1ибадатги ккола цох1о Аллагьасе гьабулеблъун, щай гурелъул, гьев г1адамазул бет1ергьан, г1адамазул хан вугелъул.
Г1ибадат гьаби ккола Аллагьасе гьабизе кколел т1адкъаязул бищунго к1вар бугезул цояб, гьелъие г1оло аварагзабиги расулалги рит1арал. Т1адег1анав Аллагьас абулеб буго (зарият) абураб сураялъул 56-57 аяталда: (Дица киналго жинал ва г1адамал рижич1о жиндеца дие лагълъи гьабизелъун гурого* Дие гьездаса кинабг1аги ризкъиги бокьун гьеч1о, яги гьез дие квен-т1ех кьеялда х1ажатавги гьеч1о дун) абун. Аллагьасул амруялъе мут1иг1лъиялъ, Аллагьасда цебе лагъзадерил к1вар бук1ин бихьизабула.

Аллагьас хурхине гьабулеб буго жиндие г1ибадат гьаби эбел-инсуе лъик1лъи гьабиялда, щай гурелъул гьезие кьезе кколеб х1акъ ц1акъ к1идияб бук1индал. Гьеб батиялъе ва дунялалда ч1аго хут1иялъе загьирияб сабаб ккола эбел-эмен, гьеб инсуца лъимадуе гьабураб лъик1лъи ц1акъ к1удияб буго. Гьедин бугелъул лъималаздаги т1адаблъун ккана жиндие лъик1лъи гьабурал эбел-инсуе лъик1лъи гьабизе.

Цинги эбел-инсудехун гьабураб лъик1лъиялда хадуб Аллагьас бицунеб буго цогидаб рахъ гьаб суалалъул, ц1акъ к1удияб к1вар бугеб. Гьеб лъик1аб пиша, ай эбел-инсудехун лъик1 рук1ин берцин гьабула гьезул ццим бахъине гьабич1ого бук1ин нилъеца бицунеб хабаралъулъ яги гьабулеб ишазулъ, гьезул к1иялго яги цоял нилъеда аск1ор херлъун хадур (Гьел эбел-инсул к1иялго яги цоял дуда аск1ор херлъун хут1ани дуца гьезда рихунеб раг1и абуге), ай "фу" абураб раг1и ккола бищун гьит1инаб раг1и, гьебги абугеян амру гьабулеб буго Аллагьас нилъеда. Гьеб гьит1инаб раг1и гьукъиялъул маг1на ккола гьелдаса ч1ах1иял гьезие зарал ругел пишаби гьукъизе цебесеб бук1ин. Эбел-инсуца дуе бокьулареб щибниги жо гьабуни мун гьезде ах1доге ва хъач1лъи бихьизабуге гьезда.

Гьезие зарал гьабун нилъеца гьаризе гьукъарал жалаздаса ккола: гьезда ццим бахъин ва рокьукъаб хабар бицин. Цебе рехсараб аяталда Аллагьас гьукъана гьездехун хъач1аб раг1и абизе, гьелдаго хадуб Аллагьас амру гьабуна гьездехун лъик1аб-х1еренаб раг1и абун хит1аб гьабеян ва гьездехун х1еренго гьуинго тамахго рук1аянги. Аллагьас абуна: (Кидаго гьезда бицунеб раг1и тамахаб, х1еренаб бице), ай гьел к1одо гьарун гьезул х1урмат гьабун. Гьединго Аллагьас абуна: (Дуца гьезда гурх1ел-рах1муялъул кваркьи лъе) ай мун гьезда гурх1ун вук1а к1удияб рах1маталдалъун, гьезие мут1иг1лъун. Кинабго нилъеда Аллагьас амру гьабурал жалазул ахирисеблъун ккола эбел-инсуе баркала кьун мут1игълъун гьезие лъик1аб хъулухъ гьабизе гьез нилъее цебеккун гьабураб хъулухъалда данде. Цинги Аллагьас нилъеда малъун абулеб буго:( Я дир Бет1ергьан, Мун гьал дир эбел-инсуда гурх1а ва гьезда Дур ц1об-рах1матги рещт1инабе, гьез дие лъик1лъи гьабураб г1адин дун гьит1инаб лъимерлъун вугеб мехалъ)-абун.

Ибну Г1аббасица абуна: "Т1адег1анав Аллагьас рещт1анила аят: (Аллагьасул расуласе ва муъминзабазе изну гьеч1о жидеца мушриказул мунагьал чури т1алаб гьабун дуг1а гьабизе, гьел мушрикал жидее г1агарал чаг1и ругониги, гьел жужах1алъул агьлу рук1ин баянлъун хадуб )сурату ат-Тавба 113 аят(.

Лъималазе лъик1аб бит1араб тарбия кьеялъул бищун к1удияб х1асил ккола лъималаз Аллагьасда гьари эбел-инсуда гурх1аян.
Лъик1ав вас ккола жиндир инсул лъик1аб нахъе хут1и ва инсул лъик1аб х1алт1и жиндир г1умруялда жаниб.
Аварагасул х1адисалда буго: "Инсан хун хадув гьесул кинабго г1амал къот1ун ккола лъабго жо хут1изег1ан: лъик1ав вас жинца инсул мунагьал чури т1алаб гьабулев, жиндасан г1адамазе мунпаг1ат щолеб г1елму ва садакъатун жариягь" ай нахъаса къот1и гьеч1еб садакъа.

Имам Х1акимица бицунеб буго: аварагас ц1уни т1алаб гьабулаан эбел-инсуе г1акъуба кьеялдаса "Аллагьас кинабго мунагьазухъ гьабулеб г1акъуба нахъе бахъула къиямасеб къоялде щвезег1ан, амма эбел-инсуе кьураб г1акъуба, Аллагьас гьаб дунялалдаго бец1ула"
Лъик1аб лъимер жиндица эбел-инсул мунагьал чуреян гьарулеб, гьеб лъимадул эбел-эмен Алжаналъул болъабазда эхедег1ан рахине гьарула. Эбел-инсуца гьикъараб мехалъ, щиб сабаблъун нижее гьаб даража кьурабан, гьезие жаваб гьабула: гьеб буго нужее лъималаз гьабураб дуг1аялъухъ абун.

Редакциялъул рахъалдасан:  хадусеб бук1ине буго

Маг1арулалде буссинабуна Абу Г1ассимица